អង់គ្លេស៖ ក្លិបបាល់ទាត់ Everton បានប្រកាសពីការតែងតាំងអតីតអ្នកចាត់ការក្លិប Burnley លោក Sean Dyche ជាអ្នកចាត់ការថ្មីក្នុងកិច្ចសន្យារយៈពេល ២រដូវកាលកន្លះ ដែលមានសុពលភាពរហូតដល់ខែមិថុនា ឆ្នាំ២០២៥ ជំនួសតំណែងរបស់លោក Frank Lampard ដែលទើបត្រូវបានបណ្តេញចេញពីតំណែង។

ក្នុងសេចក្តីប្រកាសព័ត៌មានរបស់ក្លិប លោក Sean Dyche និយាយថា៖ "ជាកិត្តិយសសម្រាប់លោកដែលត្រូវបានតែងតាំងជាគ្រូបង្វឹកក្លិប Everton ដែលលោករួមជាមួយក្រុមការងារនឹងប្រឹងប្រែងជួយឱ្យក្លិបដ៏អស្ចារ្យនេះវិលត្រឡប់មកកាន់ភាពល្អប្រសើរឡើងវិញ។ ខ្ញុំដឹងអំពីអ្នកគាំទ្រដ៏អស្ចារ្យរបស់ Everton និងថាតើក្លឹបនេះមានតម្លៃប៉ុណ្ណាសម្រាប់ពួកគេ។ យើង​ត្រៀម​ខ្លួន​ជា​ស្រេច​ដើម្បី​ធ្វើ​ការ និង​ត្រៀម​ខ្លួន​ផ្តល់​ឱ្យ​ពួក​គេ​នូវ​អ្វី​ដែល​ពួក​គេ​ចង់​បាន"។

គួរបញ្ជាក់ថា លោក Frank Lampard ត្រូវបាន Everton តែងតាំងជាអ្នកចាត់ការក្លិបកាលពីខែមករា ឆ្នាំ២០២២ ក្រោយពីលោកបានចាកចេញពីក្លិប Chelsea និងក្លិបនៅលីគលំដាប់ទី២ Derby County។ Everton ហាក់ធ្លាក់ដុនដាបក្រោមការដឹកនាំរបស់អតីតកីឡាករជម្រើសជាតិអង់គ្លេសរូបនេះ ដោយឈ្នះការប្រកួតលីគចុងក្រោយបង្អស់តាំងពីខែតុលា ដែលកាលណោះឈ្នះ Crystal Palace ៣-០ នៅទឹកដីរបស់ខ្លួន។ 

Lampard ដឹកនាំក្លិប Everton ប្រកួតចុងក្រោយបង្អស់ចាញ់ West Ham ២-០ ដែលធ្វើឱ្យ Everton ឈរនៅចំណាត់ថ្នាក់លេខ ១៩ មាន ១៥ពិន្ទុពីការប្រកួតចំនួន ២០ប្រកួត ស្មើជាមួយក្រុមបាតតារាង Southampton និងមានគម្លាត ២ពិន្ទុពីតំបន់សុវត្ថិភាព។ លោក Dyche ធ្លាប់ជាអ្នកចាត់ការដែលដឹកនាំក្លិបនៅ Premier League យូរបំផុតមួយរូប មុនពេលដែល Burnley ធ្លាក់ទៅលីគទី២កាលពីរដូវកាលមុន។ លោកធ្លាប់ដឹកនាំក្លិប Burnley ឡើងមក Premier League ២ដង គ្រាដែលលោកមកដឹកនាំក្លិប Burnley ឆ្នាំ២០១២៕